يعرفنى منين ميدان التحرير
علشان بالحضن يأخدنى ويهتف وانا دخلاه؟؟؟
يعرفنى منين ميدان التحرير
علشان يعزملى خلق كتير..تعبت رفض وتعبت تفكير..واتلموا عشان مايقولوا الأه؟؟؟
يعرفنى منين ميدان التحرير
علشان قبل حكاية التغيير..يصاحبنى على بتاع المناديل..واكتب عن حالته مقالى إياااه؟؟؟
يعرفنى ازاى؟؟يعرفنى منين؟؟
وسط الرايحين..وسط الجايين..دايسين السكة بالملايين؟؟؟
يقابلنى بناس..فتافيت من ماس..مش عارفة اقابلهم ليا سنين
يعرفنى منين؟؟
علشان يأوينى ويسعدنى
ومن اول وجديد يولدنى
ويدفينى..ويوضينى
واأصلى فى حضنه..واروحله عشان اخده فى حضنى؟؟
يقبلنى..بهمى اللى قتلنى..لكن رفضاه
يأوينى انا وملايين زيى راحت قصداه
يهدينا لحظات الثورة ..تهدينا حياة
يدينى جرعة حرية..فى زيارة غالية يومية
تثبتلى انى ماانيش وحدانى..وارجع اصدق شعبنا تـــانى
وافضل اصمم ع اللى انا رفضاه
يعرفنى منين؟؟؟
دا انا فاكرة انه جماد فى مكانه
وانا بس اللى بروحله وعرفاه
إخـــــوانى
سيبك من الفاهمين لكن ساكتين..لأن دول مواكيس
الحق والباطل فى نفس الكيس
وانا كلامى مش عن عموم إخوانى ..انا كلامى عن اللى شغله رخيص
إخوانى...
إخوانى بالاسم لكن هما دول إخوان؟؟؟
وسلفى وصوفى وأصولى ..ومنهم اللى قالولى
إسمع كلامنا بعون الله تبات كسبان
عايزينى اعمى وجاهل اردد القرأن؟؟؟
خدوا رأيى من غير ما انا افهم هو ليه وعلى ايه..
طب لو هما إخوان بجد ..بالذمة فى الدنيا حد
يسيب اخوه متغمى..ويسحبه من ايديه؟؟
عارفة لا كلكوا خير ..ولا برضه كلكوا شر..وفى كل شىء فى وفى
هو الاساس كان سليم..واسسه البنا
وطوبة ورا طوبة لما حولوه لجدار
والسلطة سافلة..تخلى الطيبين اشرار
نيجى لتقسيمة تانية..جماعة ولاد حلال شطار
وليل نهار من القناة دى للقناة دى فتاوى..واكلينها والعة نار
قالوا خلاصة الحكاية..انت ياتبقى معايا ..ياتبقى من الكفار
بالذمة يا ناس يا فاهمة..ناس همهم فكر أمة..ومشغولين جدااا بحرب العتمة
كانوا زمان بيحرموا التلفاز..ملعـــون ابوه دا الجهاز
إقتنعوا بيه ..واشتغلوا فيه..تحليل على تحريم
يحللوا المايونيز..ويحرمولنا الكريم
ويدعوا للى عاوزة عريس..ومن شدة التركيز ..فى همنا اللى يغيظ
تلقى اخونا العزيز..مش عنده وقت ولكنه ..عنده اربعة من الحريم!!
متصوفين واصوليين وسلفيين ..مين اللى مدى الحق تقسموا فى الدين؟
طب هو ده دين مين؟؟
مش هو ربنا واحد ؟؟..ورسوله سيدنا النبى؟؟وكتابه قرأن كريم؟؟
فى الفرقة دى ايه المفيد؟؟حتقدمولنا شىء جديد؟؟
واعاك تقول انك بتخدمنى..وانت بتستخدمنى..وعند ناس نافعينك انت..انت بتخدمنى
طب دا انت ناقص تقوللى ..اشرب كلور وانت جايلى..لجل النفوخ يبيض
واخدك على القمة ..وانا فى الحقيقة لودماغك فاهمة..بسحلك ع الارض
عاوزينى الغى دماغى واتبعكم بجهل؟؟
لأ..لا تقولولى إخوانى ولا تقولولى اهل
المصلحة اما يكون غطاها الدين..يبقى الحوار مش سهل
ما الغيش دماغى واسلم وانا اللى ربى معافينى من العته والجنون
ما اقفلش عقلى وابلم..وانتم تسوقونا العدد فى الليمون
ما الغيش دماغى وانا اللى ..كتابى قرأن قايللى
ورا كل حكمة فى اية..يا اولى الالباب..افلاتتدبرون؟؟افلاتعقلون؟؟
سيبونى..سيبونى اشغل دماغى واحب ربى بجد..واعز دينى بجد..
سيبونى أن الاوان..مش لما افكر تقفلوا فى وشى البيبان
لما انتو طب حملة رايات الحق..وشغلانتكم تقولوا ع المعاصى لا
ما شفتكوش ليه فى الميدان؟؟
ولا ..حنطلع بفتوى تقول السكوت ع الفساد ده من سمات الايمان؟؟؟؟
0 التعليقات:
إرسال تعليق